Galwad am Dryloywder – Datgeliad Risg Llifogydd Gwirfoddol

Heddiw (12 Chwefror) rydym wedi ysgrifennu at Brif Weithredwyr pob Cymdeithas Tai yng Nghymru, ynghyd ag Uwch Arweinwyr mewn Awdurdodau Lleol sy'n dal i gadw cartrefi. Rydym wedi galw am newid polisi yn dilyn y pryder brys a godwyd gan denantiaid yn sgil y llifogydd dinistriol a wynebodd cymunedau yng Nghymru ddiwedd 2024 a dechrau 2025.

Mae hyn yn dilyn gwaith a wnaethom ddiwedd 2024 i dynnu sylw at effaith ddinistriol llifogydd ar denantiaid a'r angen brys am fwy o dryloywder yn y maes hwn. Dolen: Llifogydd, tenantiaid a'r angen am dryloywder

Un o’r prif bryderon a godwyd gan denantiaid yw’r diffyg gwybodaeth am hanes llifogydd y cartrefi y maent yn symud iddynt. O dan y polisi presennol, nid yw'n ofynnol i landlordiaid ddatgelu a yw eiddo wedi dioddef llifogydd o'r blaen. O ganlyniad, mae llawer o denantiaid wedi dioddef difrod sylweddol i’w heiddo, heb fod yn ymwybodol y gallent fod wedi cymryd camau i amddiffyn eu cartrefi’n well.

Rydym yn cael ein calonogi gan Trivallis, un o landlordiaid cymdeithasol mwyaf De Cymru, sydd eisoes wedi ymrwymo i ddatgelu hanes llifogydd eiddo yn wirfoddol i denantiaid newydd. Mae hwn yn ddull rhagweithiol a chyfrifol o ymgysylltu â thenantiaid, ac rydym yn annog yn gryf bob landlord cymdeithasol yng Nghymru i ddilyn yr un peth.

Dyna pam rydym wedi ysgrifennu at bob landlord cymdeithasol, gan alw arnynt i adolygu a diwygio eu polisïau yn wirfoddol er mwyn sicrhau bod tenantiaid yn cael gwybod am unrhyw hanes o lifogydd yn eu cartrefi.

📄Darllenwch ein llythyr llawn at y sector yn Saesneg: [yma]
📄 Darllenwch ein llythyr yn Gymraeg: [yma]

Mae'r llythyr hwn yn cryfhau lleisiau tenantiaid ar y mater hollbwysig hwn ac yn dadlau dros ddull mwy tryloyw, sy'n canolbwyntio ar denantiaid, o ran tai.